«Եւրոպայի հայ աշակերտները՝ Արցախի մանուկներուն կողքին» ծրագիրը Համազգային հայ կրթական եւ մշակութային միութեան Եւրոպայի շրջանի  նախաձեռնութիւնն է: Ան կը ծաւալի «Եւրոպացիները յանուն Արցախի» – Europeans for Artsakh”-ի ծիրէն ներս եւ ուղղուած է Եւրոպայի հայկական ամենօրեայ եւ միօրեայ բոլոր դպրոցներու աշակերտներուն: Նպատակն է Եւրոպայի հայ աշակերտներուն առիթ ընծայել իրենց զօրակցութիւնը յայտնելու Արցախի մանուկներուն՝ գծագրութիւններով, ձեռային աշխատանքներով եւ տեսաերիզներով: Աշակերտներուն ստեղծագործութիւնները պիտի զետեղուին www.hamazkayin-europe.eu կայքին եւ մասնակցող կազմակերպութիւններուն կայքերուն մէջ, ինչպէս նաեւ ընկերային ցանցերուն մէջ:

Մասնակցութիւնը կրնայ անհատական կամ խմբային ըլլալ: Չորս տարիքային խումբ կայ.

• 3-6 տարեկան
• 6-11 տարեկան
• 11-15 տարեկան
• 15 տարեկանէն վեր

Բոլոր աշխատանքները պէտք է ըլլան լայնքին (landscape, paysage): Զանոնք համացանցին մէջ տեղադրելու համար հետեւեալ յղումը պէտք է գործածել hamazkayin-europe.eu/hy/submissions/

Մասնակցող հաստատութիւնները պատասխանատու են իրենց աշակերտներուն եւ անոնց գործերուն մասին տեղադրուած տուեալներուն, ինչպէս նաեւ աշխատանքներուն բովանդակութեան համար: Մասնակիցներու եւ ներկայացուած աշխատանքներուն  թիւի սահմանափակում չկայ:

Հոկտեմբերէն դեկտեմբեր, այս աշխատանքները արժեւորելու զանազան ծրագիրներ տեղի պիտի ունենան (ցուցահանդէս, առցանց արժեւորում…): Փափաքող հաստատութիւնները պիտի կարենան առցանց հանդիպումներ կազմակերպել Արցախի պզտիկներուն եւ իրենց աշակերտներուն միջեւ:

Հարցումներու կամ յաւելեալ տեղեկութիւններու համար գրել [email protected] հասցէին: